TOShKENT, 31 mar — Sputnik. O‘zbekistonda Rossiya bilan ishlovchi korxonalarga yengilliklar beriladi. Bu haqda prezident huzuridagi yig‘ilishda ma’lum qilindi.
Yil yakuniga qadar Rossiya bilan ishlayotgan korxonalarga debitor qarzdorligi uchun jarima qo‘llanilmaydi. Rossiya bilan ishlayotgan eksportchilarning bank kreditlari bo‘yicha qarzdorligi uzaytiriladi, penya va jarimalar undirilmaydi.
Xuddi shunday yengilliklar Ukraina va Belarus bilan ishlayotgan korxonalarga ham beriladi.
O‘tgan yil yakuni bo‘yicha O‘zbekiston va Rossiya o‘rtasidagi tovar ayirboshlash uchdan birga ortib, rekord daraja – 7,5 milliard dollarga yetgan. Joriy yilning birinchi oylarida savdo ko‘rsatkichlari 50 foizdan ziyodga oshgan.
Bugungi kunda O‘zbekistonda Rossiya ishtirokida tashkil etilgan 2 mingdan ortiq qo‘shma korxona muvaffaqiyatli faoliyat yuritmoqda, Rossiyadan mamlakat iqtisodiyotiga jalb qilingan investitsiyalar hajmi 10 milliard dollardan ziyodni tashkil etmoqda.