TOShKENT, 31-mart — Sputnik. Diyor Imomxo‘jayev 4-yil muddatga O‘zbekiston Professional futbol ligasi bosh direktori etib tasdiqlandi. Bu haqida O‘zbekiston Professional futbol ligasi xabar bermoqda.
O‘zbekiston Professional futbol ligasi Ijroiya qo‘mitasi yangi saylangan tarkibdagi ilk yig‘ilishini o‘tkazdi. Unda tashkilot bosh direktori lavozimiga Diyor Imomxo‘jayev nomzodini tasdiqlash masalasi ko‘rib chiqildi.
“2020 yilning 25-may kunidan boshlab O‘zPFL bosh direktori vazifasini bajaruvchi sifatida ishlab kelayotgan Diyor Imomxo‘jayev ortda qolgan muddat davomida amalga oshirgan ishlar inobatga olindi. O‘zbekiston Professional futbol ligasi Ustaviga muvofiq O‘FA prezidentining taqdimnomasiga asosan Liganing Ijroiya qo‘mitasi a’zolari tomonidan ovoz berish yo‘li orqali lavozimga tasdiqlandi”, deyiladi xabarda.
Ijroiya qo‘mitasining barcha a’zolari ushbu nomzodni bir ovozdan tasdiqlashdi. Endilikda Diyor Imomxo‘jayev 4-yil muddatga O‘zbekiston Professional futbol ligasi bosh direktori lavozimida o‘z faoliyatini davom ettiradi.