TOShKENT, 3 mar — Sputnik. O‘zbekiston prezidenti Shavkat Mirziyoyev davlat tashrifi bilan Pokistonga yetib bordi. Bu haqda davlat rahbari matbuot xizmati xabar bermoqda.
Islomobod shahridagi aeroportda O‘zbekiston yetakchisini Pokiston bosh vaziri Imron Xon kutib oldi.
Oliy darajadagi muzokaralar bugunning o‘zida bo‘lib o‘tadi. Unda O‘zbekiston bilan Pokiston o‘rtasidagi strategik sheriklik munosabatlarini mustahkamlash, savdo, investitsiya, sanoat kooperatsiyasi, transport, logistika, infratuzilma va turizm sohalarida amaliy hamkorlikni rivojlantirish masalalariga alohida e’tibor qaratiladi.
Bundan tashqari, xalqaro va mintaqaviy jarayonlar yuzasidan fikr almashiladi.
Muzokaralar natijasi bo‘yicha qo‘shma deklaratsiya va qator hujjatlar qabul qilinishi rejalashtirilgan.
Mirziyoyev tashrifning ikkinchi kuni Pokiston prezidenti Orif Alviy, yetakchi kompaniyalar rahbarlari bilan ham uchrashadi.