TOShKENT, 19 fev — Sputnik. Ijtimoiy tarmoqlarda Navoiy shahridagi “Yangi hayot” savdo majmuasida bobo va nabira eskalatordan qulab tushgani aks etgan videolavha tarqaldi.
Hodisa 18-fevral kuni soat taxminan 20:30da sodir bo‘ldi. Ular majmuaning 5 va 4-qavatlari oralig‘idagi eskalatorda muvozanatini yo‘qotib, 1-qavatga yiqildi.
1969 yilda tug‘ilgan fuqaro Sh.T. voqea joyida vafot etdi. Tan jarohati olgan 3 yoshli nabira A.T. esa zudlik bilan viloyat ko‘p tarmoqli bolalar tibbiyot markaziga yotqizildi.
Shundan so‘ng unda standart bo‘yicha nevrologik, ultratovush va bosh miya MSKTsi kabi qator tekshiruvlar amalga oshirildi.
Bemor A.T.ga "Qo‘shma jarohat. Bosh miya yopiq jarohati. Bosh miya lat yeyishi. O‘rta og‘ir darajasi. Peshona sohasi yumshoq to‘qimalari lat yeyishi. O‘ng tomonlama chanoq suyaklari sinib siljishi. O‘ng o‘pka lat yeyishi. Chap son pastki uchligi yumshoq to‘qimalari lat yeyishi" dastlabki tashxisi qo‘yildi.
Sog‘liqni saqlash vazirligi uning holatini nazoratga olgan. Tibbiyot xodimlari stabil og‘ir ahvoldagi bemorning hayotini saqlab qolish uchun kurashmoqda. Unga standart asosida tegishli tibbiy yordam ko‘rsatilyapti.