TOShKENT, 6 fev — Sputnik. BAAda odam savdosida gumonlanib, 9-yildan buyon qidiruvda bo‘lgan o‘zbekistonlik ayol deportatsiya qilindi.
BAAda odam savdosi bilan shug‘ullanganlikda ayblangan o‘zbekistonlik ayol mamlakatdan deportatsiya qilindi.
Interpolning O‘zbekistondagi Milliy markaziy burosi xabariga ko‘ra, ayol sotish va ekspluatatsiya qilish maqsadida yaxshi haq to‘lanadigan ish va’da qilib, qizlarni BAAga olib borgan va u yerda pasportlarini olib qo‘yib, fohishalik bilan shug‘ullanishga majburlagan.
Ayol O‘zbekistonni tark etgani bois unga nisbatan sudlanuvchi sifatida sirtdan qaror chiqarilgan bo‘lgan. U 2013-yildan beri Interpol kanallari orqali xalqaro qidiruvda bo‘lgan.
"Bugungi kunga kelib Interpol MMB va Buxoro viloyati IIB xodimlarining muzokaralari va birgalikdagi tezkor harakatlari tufayli qidiruvda bo‘lgan ayol BAA huquq-tartibot idoralari tomonidan qo‘lga olinib, O‘zbekistonga deportatsiya qilindi", — deyilgan xabarda.