Qozog‘iston prezidenti Qasim-Jomart Toqayev Xavfsizlik kengashi a’zolari, bosh prokuratura, MXQ, Ichki ishlar va mudofaa vazirliklari rahbarlari ishtirokida yig‘ilish o‘tkazdi, deb xabar qildi Sputnik Qozog‘iston.
“Yanvar voqealari” bo‘yicha 1 822ta jinoyat ishi qo‘zg‘atilib, 116tasi maxsus prokurorlarga o‘tkazilgan – Ichki ishlar vazirligi. Bular terrorchilik, qotillik, davlat amaldorlariga zo‘ravonlik qilish, bezorilik, davlat binolariga hujum qilish faktlari.
"Yuz bergan voqealar haqida taxminlar va ig‘volar asosida jamiyat o‘z fikrini shakllantirishiga yo‘l qo‘yib bo‘lmaydi. Fuqarolar hukumat shaffoflik va qonuniylikni ta’minlayotganini ko‘rishi kerak", - dedi prezident.
Fuqarolar huquqlarini himoya qilish maqsadida IIV huzurida “Ishonch telefonlari” faoliyat ko‘rsatmoqda.
Milliy xavfsizlik qo‘mitasi terrorchilik tahdidlarini bartaraf etish va kelgusida ularning oldini olish mexanizmiga doir chora-tadbirlarini ishlab chiqdi. Tafsilotlari oshkor qilinmadi.
Harbiylar IIVga Olmaotada qonun va tartibni ta’minlashda yordam berishda davom etmoqda. U yerda terrorchilik xavfining “qizil” darajasi hamon saqlanib qolmoqda.
Harbiy obyektlar, qurol-yarog‘ va o‘q-dorilar omborlari kuchaytirilgan xizmat tartibida qo‘riqlanmoqda.
Fuqarolarning hibsga olinishi va huquqlarining buzilishi to‘g‘risida 84ta ariza kelib tushdi, 96 nafar hibsga olingan kishi ozod etildi – Bosh prokuratura.
Hibsga olingan 3 314 nafar shaxsdan 1 884 nafari jazoni yengillashtirish haqida apellyatsiya arizasi bilan murojaat qildi, 1 083 nafari qamoqdan ozod etildi, 490 nafar fuqaroga jarima jazosi ogohlantirishga almashtirildi.