TOShKENT, 11 yanv - Sputnik. Respublikaning eng serqatnov yo‘llaridan biri bo‘lgan “Toshkent-Chinoz” avtomobil yo‘lini ta’mirlash loyihasi Shavkat Mirziyoyev huzurida bo‘lib o‘tgan majlisda ko‘rib chiqildi.
Toshkent viloyatida avtomobil yo‘llarini kengaytirib, yo‘l bo‘yi xizmatlarini ko‘paytirish, savdo va servisni rivojlantirish bo‘yicha qator loyihalar ishlab chiqilmoqda.
“Toshkent-Chinoz” avtomobil yo‘lini ta’mirlash loyihasi ulardan biri. Ma’lumki, bu yo‘l juda serqatnov bo‘lib, bir kecha-kunduzda 60-65 ming avtotransport harakatlanadi. Shu bois uning 10 kilometr qismini ta’mirlash, 5 dona yerosti o‘tish yo‘lagi va qo‘shimcha mahalliy yo‘llar qurish mo‘ljallangan, - deyilgan xabarda.
Shuningdek, Toshkentdagi Temur Malik ko‘chasini 6 polosagacha kengaytirish, uning ikki chetida ko‘p qavatli uy va xizmat ko‘rsatish binolari qurish, Jizzax shahridagi O‘zbekiston ko‘chasida 210 metrli yo‘l o‘tkazgich barpo etish bo‘yicha ham loyihalar muhokama qilindi.
Shavkat Mirziyoyev ushbu loyihalarni ma’qulladi va ularning hujjatlarini ishlab chiqish, sifatli qilib qurish bo‘yicha topshiriq berdi.