TOShKENT, 1 yanv — Sputnik. Ichki ishlar vaziri Po‘lat Bobojonovning shaxsiy tarkib bo‘yicha buyrug‘i bilan lavozim tayinlovlari amalga oshirildi.
Xususan, polkovnik Olim Saidov IIV Jamoat xavfsizligi departamenti boshlig‘i o‘rinbosari – yo‘l harakati xavfsizligi xizmati boshlig‘i lavozimiga tayinlandi. Tayinlovga qadar Saidov IIV Yo‘l harakati xavfsizligi bosh boshqarmasi boshlig‘i lavozimida ishlagan.
Polkovnik Baxtiyor Berdialiyev IIV Jamoat xavfsizligi departamenti boshlig‘i o‘rinbosari – huquqbuzarliklar profilaktikasi xizmati boshlig‘i lavozimiga tayinlandi. Avval Berdialiyev IIV Huquqbuzarliklar profilaktikasi bosh boshqarmasi boshlig‘i lavozimida faoliyat yuritgan.
Podpolkovnik Davron Azizov IIV Jamoat xavfsizligi departamenti boshlig‘i o‘rinbosari – jamoat tartibini saqlash xizmati boshlig‘i vazifasini bajaruvchisi etib tayinlandi. Azizov shu vaqtgacha IIV Huquqbuzarliklar profilaktikasi xizmati boshlig‘i o‘rinbosari-huquqbuzarliklar profilaktikasi faoliyatini tashkil etish boshqarmasi boshlig‘i lavozimida mehnat qilgan.
Polkovnik Amanbay Orinbayev IIV Probatsiya xizmati boshlig‘i lavozimiga tayinlandi. Tayinlovga qadar Orinbayev IIV Jamoat tartibini saqlash xizmati boshlig‘ining 1-o‘rinbosari lavozimida faoliyat yuritgan.