TOShKENT, 31 dek — Sputnik. O‘zbekistonda 2022-yil "Inson qadrini ulug‘lash va faol mahalla yili" deb e’lon qilindi.
Bu haqda prezident Shavkat Mirziyoyev Yangi yil munosabati bilan O‘zbekiston xalqiga yo‘llagan tabrigida ma’lum qildi.
Prezident yangi yilga nom berishda keng jamoatchilikning fikrlarini o‘rganilganini bildirdi.
“Ana shu takliflardan kelib chiqib, men Yangi – 2022-yilni mamlakatimizda "Inson qadrini ulug‘lash va faol mahalla yili" deb e’lon qilishni taklif etaman. Inson qadrini ulug‘lash – yurtimizda yashayotgan har bir odamning huquq va erkinliklari, qonuniy manfaatlarini ta’minlash demakdir" - dedi prezident.
U bu borada jamiyat asosi bo‘lgan mahalla hal qiluvchi o‘rin tutishi, mahalla tinch bo‘lsa, yurt tinch bo‘lishini ta’kidladi.
"Mahalla obod bo‘lsa, mamlakat obod bo‘ladi. Shu bois, bundan buyon har bir mahallada samarali ish olib borish faoliyatimizning bosh mezoniga aylanadi", - deya qo‘shimcha qildi Shavkat Mirziyoyev.
Prezident yilni nomlash bo‘yicha taklifini birinchi marotaba Yangi yil arafasida e’lon qilmoqda. Oldingi yillar bu taklif parlamentga murojaat davomida bildirilayotgan edi.