TOShKENT, 6 dek – Sputnik. O‘zbekiston prezidenti Shavkat Mirziyoyev Nur-Sulton shahridagi "Otan korg‘aushilar" ("Vatan himoyachilari”) monumentiga gul qo‘ydi, deb xabar bermoqda davlat rahbari matbuot xizmati.
Ushbu yodgorlik Ikkinchi jahon urushida halok bo‘lgan qozog‘istonlik jangchilar xotirasiga bag‘ishlab bunyod etilgan. Uning balandligi 37 metr. Monument markazida Vatan timsoli - ona tasvirlangan.
Xorijiy davlatlar rahbarlari bu yodgorlikka gul qo‘yib, Qozog‘iston xalqiga hurmat-ehtiromini bildiradilar.
Eslatib o‘tamiz, 5-dekabr kuni Shavkat Mirziyoyev davlat tashrifi bilan Qozog‘istonga tashrif buyurdi. Uni aeroportda Qozog‘iston prezidenti Qasim-Jomart Toqayevning shaxsan o‘zi kutib oldi. Tashrifning asosiy tadbirlari bugun, 6-dekabrga mo‘ljallangan.