TOShKENT, 21 noya — Sputnik. O‘zbekistonda endi abituriyentlarning maktabdagi baholari oliy ta’lim muassasalariga kirishda hisobga olinadi.
Bu Hukumat qarori bilan tasdiqlangan Ta’lim tashkilotlari bitiruvchilari baholarining o‘rtacha ko‘rsatkichini hisoblash va uni oliy ta’lim tashkilotlariga kirish imtihonlarida inobatga olish tartibi to‘g‘risidagi nizomda belgilab qo‘yildi.
Nizomga muvofiq, maktab bitiruvchilarining shahodatnomasidagi 11-yillik ta’limning so‘nggi 6-yillik baholari OTMga kirishdagi balga qo‘shiladi. Baholar elektron platformalar orqali hisoblanadi va DTMning “ABITUR” dasturiga yuboriladi.
Baholarning o‘rtacha ko‘rsatgichi 6-11-sinflardagi yoki 6-9-sinflar va 1-2-bosqichlardagi yillik baholarning umumiy yig‘indisini o‘qitilgan fanlarga bo‘lish orqali chiqariladi.
Maksimal ball 100 foiz deb olinadi va ballar baho tizimiga quyidagicha o‘tkaziladi:
86-100% uchun – 5 baho;
71-85% – 4 baho;
56-70% – 3 baho va 56%gacha – 2 baho.
Ushbu tartib 2022/2023 yil o‘quv yilidan qo‘llaniladi.