TOShKENT, 15 noya – Sputnik. Sog‘liqni saqlash vaziri Behzod Musayev boshchiligidagi ishchi guruh poytaxt shifoxonalaridagi vaziyatni o‘rgandi.
SSV matbuot xizmati xabariga ko‘ra, mamlakatda yosh bolalar orasida o‘tkir respirator kasalliklarning davriy ko‘tarilishi kuzatilmoqda. Ushbu xastaliklarning eng yuqori ko‘rsatkichi esa Toshkent shahri hissasiga to‘g‘ri kelyapti. Natijada poytaxtdagi bolalar klinik shifoxonalariga yuklamalar sezilarli ortgan.
“Shu sababli sog‘liqni saqlash vaziri Behzod Musayev boshchiligida ishchi guruh tuzilib, 13-noyabr tunda poytaxt shifoxonalaridagi vaziyat o‘rganildi”, - deyilgan vazirlik xabarida.
Shundan so‘ng 14-noyabr tonggi soat 04:30 da Toshkent shahrida bolalar o‘rtasida o‘tkir respirator kasalliklar tarqalishi bilan bog‘liq muammolarni zudlik bilan bartaraf etish maqsadida Musayev boshchiligida shoshilinch yig‘ilish o‘tkazilgan.
Natijada o‘sha kunning o‘zida o‘rganish xulosalari tahlil qilinib, poytaxtdagi shifo maskanlarida 600 dan ziyod qo‘shimcha o‘rin-joylar tashkil etilgan. Ona va bolalarga davolanishlari uchun yetarli sharoitlar yaratildi.
Eslatib o‘tamiz, 11-noyabr kuni O‘zbekiston prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangan edi.