TOShKENT, 28 okt - Sputnik. Bundan buyon Surxondaryo viloyati xodimlari tomonidan jamoat tartibini saqlashda qoidabuzarlarga elektroshoker qo‘llaniladi, deb xabar qilmoqda IIV matbuot xizmati.
Surxondaryo viloyati IIV xodimlariga "Skorpion" rusumli elektroshokerlar tarqatildi. Qurilma rezina tayoq, ya’ni "dubinka"ga o‘xshash shaklda ishlab chiqarilgan bo‘lib, undan nafaqat elektroshok sifatida, zaruratga qarab "dubinka" sifatida ham foydalanish mumkin.
Elektroshoker inson sog‘lig‘iga katta zarar yetkazmagan holda uni vaqtincha harakatsizlantirsh imkonini beradi. Elektroshok ta’sirida inson tanasi birinchi soniyada og‘riq zarbasini his etsa ikkinchi soniyada mushaklar muvozanati yo‘qolishiga olib keladi.
Lekin elektroshokerni, keksa yoshdagilar, nogironligi aniq ko‘rinib turgan shaxslar, yosh bolalar, hamda homilador ayollarga nisbatan qo‘llash taqiqlanadi. Faqat guruh bo‘lib hujum qilganda ushbu ta’qiq amal qilmaydi.
IIV xabar qilishiga ko‘ra, O‘zbekistonda jamoat tartibini saqlash bilan shug‘ullanayotgan inspektorlarning zarur vosita va anjomlar bilan ta’minlanish moddiy texnik bazasi yildan yilga boyitib borilmoqda.