TOShKENT, 22 okt – Sputnik. O‘zbekiston metropoliteni 2022-yil oxiriga qadar 19 ta yangi poyezdlarni harid qilishni rejalashtirgan. Bugun 5 ta yangi metro poyezdlarining tanishtiruv taqdimoti bo‘lib o‘tdi, deb xabar bermoqda Sputnik muxbiri.
Kuni kecha “Toshkent metropoliteni faoliyatini samaradorligini oshirish chora-tadbirlari to‘g‘risida”gi prezident qarori qabul qilingan.
Hozirgi kunda Toshkent metropoliteni tizimida 59 ta metro poyezdlari xizmat ko‘rsatmoqda, bugungi 5 ta yangi poyezdlar bilan Toshkent metrolarining umumiy soni 64 taga yetdi. Bu ko‘rsatkich o‘sishda davom etib, 2022-yil oxiriga kelganda 80 tani tashkil etishi kutilmoqda.
Yangi poyezdlar yo‘lga qo‘yilishi, insonlarning kutish intervaliga sezilarli darajada ta’sir qilib, qisqarishi kutilmoqda.
Qachonlardir, xususan 1993-yilda Chilonzor metro yo‘nalishi 3 minutli interval bilan harakat qilgan. O‘sha kunlar joriy yilning 1-sentabridan boshlab yana qaytgan. Chilonzor yo‘nalishida 3 minutli interval yo‘lga qo‘yildi, O‘zbekiston yo‘nalishi uchun esa 4 minut etib belgilandi. Shu tariqa insonlarning o‘z manzillariga yetib borishlaridagi vaqtlari 30 foizga tejaldi.
Metropoliten ma’lumotiga ko‘ra, shahar usti transporti bilan solishtirilganda, metro orqali manzilga yetib borish 2-3 marta tez ekanligi ayon bo‘lgan.
Yangi Toshkent metropolitening kunlik tashish hajmi 480-500 ming nafarni tashkil etishi kutilmoqda, bu esa o‘z navbatida shahardagi tirbandliklarni kamaytirishga salmog‘li hissa qo‘shishi kutilmoqda.
Demak, bugungi taqdimotda Rossiyaning "Metrovagonmash” zavodidan yuborilgan vagonlardan 5 ta yangi metro poyezdlari yo‘lovchilar uchun xizmat ko‘rsatishni boshladi.
Yangi metro vagonlari haqida, 4-yildan beri Toshkent metropolitenida elektromashinist lavozimida ishlab kelayotgan Fazliddin G‘ofurov o‘z fiklarini bildiradi.
“Rossiyadan olib kelingan poyezd vagonlarinig ichki tomonlarida ortiqcha shovqin eshitilmasligi yo‘lovchilar uchun qulaylik tug‘diradi," – deydi mashinist.
Metro poyezdi to‘liq kompyuterlashtirilgan bo‘lib, mashinist maxsus pult orqali boshqaruvni amalga oshiradi.
“Yana bir yaxshi tomoni, mashinist kabinasidan turib, hamma vagonlarni kuzatib, ichkaridagi holatdan xabardor bo‘lib turishim mumkin”, – deya qo‘shimcha qiladi Gofurov.
Metro vagonlariga qo‘shimcha monitorlar ham kuyilgan. Bunday sensorli monitorlar yordamida yo‘lovchilar marshrut bo‘yicha o‘zlariga kerakli ma’lumotlarni olishlari mumkin.
Yangi metro vagonlari 2021-yilda ishlab chiqarilgan bo‘lib, 31-yil muddatgacha eskpluatatsiyaga yaroqli hisoblanadi. Maksimal 90 kilometrgacha tezlikni oshirish qudratiga ega. Maksimal 310 nafargacha odamni o‘z bag‘riga sig‘dira oladi.