TOShKENT, 6 okt – Sputnik. Qiziqchi va so‘z ustasi Valijon Shamshiyev Toshkent shahri Yashnobod tumanidagi “Barkamol avlod” bolalar maktabi direktori lavozimiga tayinlandi.
Respublika “Barkamol avlod” bolalar maktabi matbuot xizmati xabariga ko‘ra, tayinlov Xalq ta’limi vazirligi xulosasi asosida amalga oshirilgan.
“Hammamizning maqsadimiz bitta — O‘zbekiston kelajagini yanada gullatib yashnatish va uning uchun farzandlarimizni tarbiyalash. Farzandlar tarbiyasida qo‘limdan kelgancha sizlar bilan birgalikda xizmat qilaman", — deya o‘z xizmat vazifasiga kirishdi Shamshiyev.
Qayd etish joizki, 2019-yilning oktabrida O‘zbekiston prezidentining tegishli qarori bilan XTV tasarrufidagi “Barkamol avlod” respublika va hududiy bolalar markazlari negizida Respublika va hududiy “Barkamol avlod” bolalar maktablari tashkil etilgan edi. Bunday maktablarda 2020/2021-o‘quv yilidan boshlab "STEAM — ta’lim" dasturi joriy etilishi belgilangan.