TOShKENT, 22 sen — Sputnik. Dushanbeda bo‘lib o‘tadigan biznes-forumda O‘zbekistondan 40 tadan ortiq kompaniya ishtirok etadi, deb xabar berdi Tojikiston Savdo-sanoat palatasi matbuot xizmati.
Ikki tadbirda o‘zbekistonlik ishbilarmonlarning ishtiroki kutilmoqda.
"O‘zbekiston delegatsiyasi tarkibida - to‘qimachilik, charm va poyabzal, oziq–ovqat mahsulotlari, zargarlik buyumlari, farmatsevtika, qurilish va mebel ishlab chiqaruvchi 40 dan ortiq kompaniya bo‘ladi", - deyiladi xabarda.
Dushanbeda Made in Uzbekistan biznes missiyasi Tojikiston Savdo-sanoat palatasi va O‘zbekiston Investitsiyalar va tashqi savdo vazirligi bilan birgalikda tashkil etiladi.
23-24 sentabr kunlari Dushanbeda biznes-forum va O‘zbekistonda ishlab chiqarilgan mahsulotlari ko‘rgazmasi bo‘lib o‘tadi.
Iqtisodiyotning 14 tarmog‘i o‘z yutuqlarini namoyish etadi. Ishlab chiqaruvchilar qishloq xo‘jaligi va oziq-ovqat mahsulotlarini namoyish qiladilar.
Shuningdek, ko‘rgazmada qurilish materiallari, to‘qimachilik va kiyim-kechak, charmdan yasalgan aksessuarlar va poyabzal, ipak matolar va buyumlar, elektronika va maishiy texnika, mebel, santexnika, zargarlik buyumlari va boshqalarni ko‘rish mumkin.
Biznes-forum doirasida investitsiyalarni jalb qilish, qo‘shma korxonalar ochish, Tojikistonda va erkin iqtisodiy zonalarda ishlab chiqarishni yo‘lga qo‘yish masalalari muhokama qilinadi.