TOShKENT, 19 sen — Sputnik. Mahallalarda, bozorlarda faoliyat olib boruvchi ekologiya politsiyasi xodimlariga xizmat avtomobillari kaliti topshirildi. Bu haqda Davlat ekologiya qo‘mitasi matbuot xizmati xabar qildi.
18 sentabr kuni Butunjahon tozalik kuni doirasida Zahiriddin Bobur nomidagi ekobog‘da ekologik nazorat guruhi uchun avtomobillar taqdimoti o‘tkazildi. Ekologik nazorat guruhlari tarkibiga shahar yo‘l harakati xavfsizligi boshqarmasi, post-patrul xizmati va Davlat ekologiya qo‘mitasi xodimlari kiradi.
Eslatib o‘tamiz, O‘zbekistonda ekologiya politsiyasini tashkil etish taklifi prezident Shavkat Mirziyoyev tomonidan 24-avgust kuni respublikadagi ekologik holatni yaxshilash bo‘yicha o‘tkazilgan tanqidiy ruhdagi video-selektor yig‘ilishida o‘rtaga tashlangan edi.
Ekopolitsiyaning asosiy vazifasi sifatida hududiy ekologiya organlari bilan hamkorlikda ekologik qonun buzilishlarga qarshi kurashish, reyd tadbirlarini o‘tkazish nazarda tutilmoqda.
IIV matbuot xizmati rahbari Shohruh G‘iyosov Sputnik nashriga ayni vaqtda mamlakatda ekopolitsiyani tashkil etish bo‘yicha farmon loyihasi ustida ish olib borilayotganini ma’lum qilgan edi.