TOShKENT, 9 sen – Sputnik. Prezident Shavkat Mirziyoyev O‘zbekistonda 2023-yildan qo‘shilgan qiymat solig‘i (QQS) stavkasini tushirilishini ma’lum qildi, deb xabar qilmoqda Sputnik muxbiri.
“Yaxshi bilasizlar, 2020-yilda qo‘shilgan qiymat solig‘i stavkasini 20 foizdan 15 foizga tushirgan edik. Bu — 100 ming tadbirkor ixtiyorida 10 trillion so‘m mablag‘ qoladi, degani. Endi, zarur tayyorgarlik ko‘rgan holda, 2023-yildan boshlab, ushbu soliq stavkasini 15 foizdan 12 foizga tushiramiz”, — dedi davlat rahbari O‘zLiDeP X quroltoyidagi chiqishi davomida.
Bundan tashqari, 2023-yildan yuridik shaxslarning mol-mulk va yer soliqlarini birlashtirib, yagona ko‘chmas mulk solig‘i joriy qilinadi.
Shuningdek, bank, moliya, telekommunikatsiya kabi tadbirkorlik yo‘nalishlarida foyda solig‘i stavkasi har xil bo‘lib, ular amaldagi 20 foizdan 15 foizga tushiriladi va barcha tadbirkorlar uchun bir xil bo‘ladi.