TOShKENT, 24-iyul – Sputnik. Surxondaryo viloyatining ichimlik suvi bilan ta’minlanmagan hududlarid aholisiga maxsus avtomobillar topshirildi, deb xabar qilmoqda “O‘zsuvta’minot” AJ matbuot xizmati.
Surxondaryo viloyatining ichimlik suvi yetib bormagan hududlarida istiqomat qiluvchi fuqarolarni vaqtinchalik ichimlik suvi bilan ta’minlash maqsadida Xitoydan olib kelingan 25 ta "SHACMAN" rusumli maxsus avtomashinalarining aholiga tantanali topshirish marosimi bo‘lib o‘tdi, - deyilgan xabarda.
Marosimda “O‘zsuvta’minot” AJ boshqaruvi raisi Sohib Saifnazarov, O‘zbekiston Respublikasi Mahalla va oilani qo‘llab-quvvatlash vaziri o‘rinbosari Botir Parpiyev va Surxondaryo viloyat hokimi To‘ra Bobolovlar ishtirok etishdi.
Eslatib o‘tamiz, 2030-yilga qadar 100% aholini toza ichimlik suvi bilan ta’minlash – O‘zbekistonning strategik rivojlanish dasturiga kiritilgan masalalardan biridir. Ushbu maqsadga erishish uchun Respublikada rejali ishlar bosqichma-bosqich amalga oshirilmoqda.