Qator soha vakillarini COVID-19 ga qarshi ommaviy emlanishni tavsiya qilmoqchimiz – Ismoilov

Quyi palata yalpi majlisida emlash jarayonlari sust olib borilayotgan sohalarni tanqid ostiga olinadi.
Sputnik
TOShKENT, 14-iyul — Sputnik. 15-iyul kuni Qonunchilik palatasining yalpi majlisida aholini koronavirus infeksiyasiga qarshi emlash doirasida amalga oshirilayotgan ishlar muhokama qilinadi. Bu haqda quyi palata spikeri Nurdinjon Ismoilov ma’lum qildi.
Yalpi majlisda Sanitariya-epidemiologik osoyishtalik va jamoat salomatligi xizmati rahbari Bahodir Yusupaliyevning axboroti eshitiladi.
Toshkent shahrida qo‘shimcha emlash punktlari tashkil etildi – ro‘yxat
Qayd etilishicha, majlisda Sog‘liqni saqlash vazirligi va Agentlik rahbarlariga deputatlarning jiddiy e’tirozi va ko‘plab savollari bo‘ladi. Emlash jarayonlari sust olib borilayotgan sohalarni tanqid ostiga olinadi.
“Biz, Qonunchilik palatasi qarorida Hukumatga, Sog‘liqni saqlash vazirligi va boshqa idoralarga, ayniqsa, koronavirusga qarshi kurash bo‘yicha Respublika komissiyasiga bir qator tavsiyalarni beramiz. Jumladan, aholining bir qator qatlamlariga koronavirus infeksiyasiga qarshi ommaviy emlash o‘tkazish lozimligini tavsiya qilmoqchimiz”, - deyilgan xabarda.
Avvalroq Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov O‘zbekistonda koronavirusga qarshi majburiy emlash g‘oyasini to‘g‘ri deb hisoblashini aytgandi.
So‘nggi ma’lumotlarga ko‘ra, mamlakatda koronavirusga qarshi emlash jarayonlari boshlangan buyon jami 5,1 million dozadan ziyod vaksinadan foydalanilgan. Shu kungacha to‘liq emlangan fuqarolar 938 529 nafarni tashkil qilmoqda.