Kamida 486 kishi Kanada g‘arbidagi Britaniya Kolumbiyasi viloyatida kuzatilgan anomal issiq ob-havo qurboni bo‘lgan bo‘lishi mumkin.
Britaniya Kolumbiyasi viloyatida o‘rmon yong‘inlari ham kuzatilmoqda.
Ayrim joylarda vaziyat chidab bo‘lmas darajada, ko‘chaga chiqish deyarli imkonsiz.
Bunday ob-havo sharoitida surunkali kasalliklarga chalingan odamlar, asab kasalliklari bo‘lgan fuqarolar, shuningdek, konditsionersiz xonalarda ko‘p vaqt o‘tkazadigan yolg‘iz odamlar va shahar aholisi xavf ostida hisoblanadi.
Tibbiyot xodimlari aholiga ko‘chada kamroq yurish, ko‘proq suv ichish va bosh kiyimda bo‘lish zarurligini tavsiya qilishmoqda.
Vankuver shahri politsiyasi to‘satdan o‘limlar haqida 65 ta xabar kelib tushganini bildirgan.
Taxmin qilinishicha, bu odamlarning o‘limi yuqori havo haroratiga bog‘liq. O‘lganlardan ko‘pi pensionerlar bo‘lgan.
Mahalliy meteoburo ma’lumotlariga qaraganda, 30-iyun kuni Litton shahrida havo haroratining mutlaq rekordi qayd etilgan. Havo 49,5 darajagacha isib ketgan.