TOShKENT, 30-iyun — Sputnik. O‘zbekiston – Turkiya biznes forumi yakunlari bo‘yicha umumiy qiymati 679 million dollarlik 25 ta hujjat imzolandi. Bu haqda Investitsiyalar va tashqi savdo vazirligi matbuot xizmati xabar qildi.
Ulardan 514,7 mln dollari 10 ta investitsiya loyihalariga yo‘naltiriladi, yana 165,2 mln dollari savdo shartnomalariga to‘g‘ri keladi.
O‘zbekiston – Turkiya biznes forumi 28-iyun kuni Toshkent shahrida bo‘lib o‘tdi.
Tadbirda O‘zbekiston bosh vazirining o‘rinbosari – investitsiyalar va tashqi savdo vaziri Sardor Umurzakov, Turkiya vitse-prezidenti Fuat Oktay, O‘zbekiston tomonidan tegishli vazirlik, idora va tarmoq birlashmalari rahbarlari, shuningdek, ikki mamlakat ishbilarmon doiralarining 250 dan ortiq vakillari ishtirok etdi.