TOShKENT, 29-iyun - Sputnik. Jazirama tufayli O‘zbekistonda ayrim poyezdlar harakat jadvalida o‘zgarishlar kuzatilishi mumkin.
Bu haqda O‘zbekiston Respublikasi Transport vazirligi axborot xizmati xabar bermoqda.
"Issiq havo paytida po‘lat izlardagi harorat yanada yuqori bo‘ladi. Shu bois, harakat xavfsizligini ta’minlash maqsadida 2021-yil 7-iyul sanasiga qadar cho‘l hududlarida poyezdlar harakat jadvalida o‘zgarishlar kuzatilishi mumkin", - deyiladi vazirlik xabarida.
Eslatib o‘tamiz, O‘zbekiston gidromeorologiya xizmati markazidan olingan xabarga ko‘ra, 2021-yil 28-iyundan boshlab mamlakat hududiga Volga bo‘yi hududlaridan issiq va quruq havo kirib keldi.
Hafta davomida O‘zbekiston bo‘yicha havo harorati kechalari 22-25°, kunduz kunlari 38-41°, shimolda, janubda va cho‘l hududlarida ba’zi joylarda 43° gacha atrofida bo‘ladi.