TOShKENT, 23-iyun — Sputnik. Rossiya Federatsiya Kengashi barcha mehnat migrantlarini barmoq izlarini topshirish va tibbiy ko‘rikdan o‘tkazishga majbur qiladigan qonunni ma’qulladi.
Bugun yig‘ilishda Federatsiya Kengashi yagona federal sanitariya-epidemiologiya ma’lumotlar bazasini yaratish to‘g‘risidagi qonunni ma’qulladi, unda xorijiy fuqarolar va fuqaroligi bo‘lmagan shaxslarning tibbiy ko‘riklari va ularning natijalari to‘g‘risidagi ma’lumotlar to‘planadi.
Hujjat Rossiya Federatsiyasida yashash guvohnomasi (VNJ), ishlash uchun ruxsatnoma yoki mehnat patentini olishni istagan chet el fuqarolari va fuqaroligi bo‘lmagan shaxslarni davlat yoki shahar muassasalarida tibbiy ko‘rikdan o‘tkazishga majbur qiladi. Tibbiy ko‘rik Rossiya Federatsiyasi hududida joylashgan tibbiyot tashkilotlarida o‘tkaziladi, Rossiya Federatsiyasi subyekti davlat hokimiyatining yuqori ijro etuvchi organi bunday tibbiy ko‘rikni o‘tkazishga vakolatli tibbiyot tashkilotlari ro‘yxatini belgilaydi.
Hozir Rossiyaga ishlash uchun kelgan chet elliklar mehnat patentini olish uchun hujjat topshirganda barmoq izlari va tibbiy ko‘rikdan o‘tadilar. Boshqa maqsadlarda kelgan chet elliklar yoki YeOII bo‘yicha sherik-davlatlaridan kelgan fuqarolardan bu talab qilinmas edi.