TOShKENT, 2-iyun — Sputnik. O‘zbekistonda kelgusida oliy ta’lim muassasalariga kirish imtihonlari bekor qilinishi mumkin. Bu haqda DTM bosh boshqarmasi boshlig‘i Farhod Mirzayev ma’lum qildi.
Uning so‘zlariga ko‘ra, OTMlarga kirish imtihonlari bekor qilinib, xorij OTMlari tajribasida bo‘lgan kirish imtihonlari bo‘lmasligi bosqichma-bosqich O‘zbekistonda ham amalga oshirilishi rejalashtirilgan.
“Unifikatsiya bo‘yicha qaror tegishli organga kiritilgan. Agar bu tasdiqlansa, biz kirish imtihonlaridan voz kechib, bosqichma-bosqich maktablarda olinadigan imtihonlar hisobiga bolalarni OTMlarga qabul qilishni yo‘lga qo‘yamiz. Masalan, to‘rtta viloyat tanlab olinib, birinchi bosqichda shu viloyatlarda o‘tkazish masalasi ko‘riladi. Keyinchalik qolgan hududlarda ham bu amalga oshiriladi”, — dedi Farhod Mirzayev.
Shuningdek, u 2021/2022-o‘quv yili uchun OTMlarga kirish test sinovlarini 2 ta ssenariy — yopiq va ochiq maydonlarda o‘tkazish kelishib olinganini ma’lum qildi. Joriy yilda kirish imtihonlarida 1,6 mln abituriyent qatnashishi kutilmoqda.
Test sinovlari o‘tkazish uchun 46 800 nafar abituriyent uchun mo‘ljallangan 96 ta katta sig‘imli yopiq bino, 59 040 nafar abituriyentni sig‘diradigan 65 ta stadion tanlangan.