TOShKENT, 14-may — Sputnik. Bolalar ustidan pul sochgan fuqaro Ichki ishlarga taklif qilinib ushuntirish ishlari olib borilganidan so‘ng uzr so‘radi, deb xabar qilmoqda Samarqand viloyati IIB.
Eslatib o‘tamiz Ramazon hayiti kuni ijtimoiy tarmoqlarda urgutlik yigitning pul sochayotgani aks etgan videolavha tarqalgan edi. Ushbu hodisa o‘zbekistonliklar orasida turli salbiy fikrlar bildirilishiga olib kelgan edi.
Ushbu holat IIB tomonidan o‘rganib chiqilganda, Urgut tumani “Vag‘ashti” mahallasida yashovchi, 1991-yilda tug‘ilgan N.J. Ramazon hayiti munosabati bilan qarindosh va qo‘shnilarini mehmondorchilikka chaqirib, ularning farzandlarini xursand qilish maqsadida ustilariga pul sochgani aniqlangan.
Shundan so‘ng N.J. bilan olib borilgan suhbat davomida u qilgan ishidan chin ko‘ngildan pushaymonligini va ushbu holat takrorlanmasligini bildirdi. Fuqaroga nisbatan ma’muriy bayonnoma rasmiylashtirildi, deyilgan xabarda.