TOShKENT, 12-may — Sputnik. Prezident Shavkat Mirziyoyev 12-may kuni bo‘lib o‘tgan videoselektor yig‘ilishida oziq-ovqat mahsulotlari yetishtirishni ko‘paytirish bo‘yicha topshiriq berdi.
Davlat rahbari matbuot xizmati xabariga ko‘ra, joriy yilda chorvachilik yo‘nalishida mingta, parrandachilikda 277 ta korxonani ishga tushirish rejalashtirilgan.
Bundan tashqari, 1 million gektardan ziyod asosiy maydonlarda hamda ekinlardan bo‘shaydigan yerlarda sabzavot, kartoshka, sholi, poliz va ozuqa mahsulotlarini yetishtirish mo‘ljallangan.
Prezident yog‘-moy mahsulotlariga aholi talabini qondirish maqsadida joriy yilda 246 ming tonna moyli ekinlar yetishtirib, 86 ming tonna moy ishlab chiqarish bo‘yicha mutasaddilarga ko‘rsatma berdi.
Avvalroq mamlakatda o‘simlik yog‘i narxi sezilarli oshgan edi va bu aholining jiddiy xavotiriga sabab bo‘ldi. Hukumat ichki bozorlarda o‘simlik yog‘i narxi keskin oshishining oldini olish maqsadida uni QQSdan ozod qildi.