TOShKENT, 19 apr – Sputnik. Amerikaning Stenford universiteti olimlari ta’kidlashiga ko‘ra, inson tanasining qarishi bu to‘xtovsiz jarayon emas, inson uch bosqichda qariydi.
Shu kunga qadar odamlar va shifokorlar inson organizmi har kuni oz-ozdan keksayib boradi deb o‘ylardi, lekin amerikalik olimlar haqiqatda bunday emas deb ta’kidlashmoqda.
Bunga Stenford uninversitetining 16 nafar mutaxassisdan iborat olimlar jamoasi yaqinda o‘tkazgan tadqiqoti asos bo‘ldi. Ular 18 yoshdan 95 yoshgacha bo‘lgan 4263 nafar kishilar organizmini sinchiklab o‘rganib chiqishi natijasida, inson qon plamasida oqsillar keskin farq qiladigan uchta guruhni aniqlashgan: 34 yoshdan yuqori, 60 yoshdan yuqori va 78 yoshdan yuqori.
“Biz qon tarkibida bo‘lgan 3000 dan ortiq oqsil turlarini o‘rganib chiqib, ular 34, 60 va 78 yoshda to‘lqinsimon o‘zgarishini aniqladik. Bundan biz inson organizmi uch bosqichda biologik qarishi haqida xulosa qildik”, - deyilgan “Nature Medicine” jurnalida chop etilgan maqolada.
Hozircha qondagi o‘zgarishlar va inson yoshi bir-biriga qanday bog‘liqligi mexanizmi ma’lum emas. Lekin kelajakda olimlar buni aniqlashi va keksa yoshda uchraydigan ayrim kasalliklar, masalan Alsgeymer kasalligi, yurak-qon tomirlari kasalligi va boshqalarni oldini olish mumkin bo‘ladi.