TOShKENT, 8 apr — Sputnik. “O‘zbekkino” milliy agentligi Kinematografiya agentligi etib qayta nomlandi. Bu prezident Shavkat Mirziyoyev imzolagan “Kino san’ati va sanoatini yangi bosqichga olib chiqish, sohani davlat tomonidan qo‘llab-quvvatlash tizimini yanada takomillashtirish to‘g‘risida”gi farmonda aytilgan.
Farmon bilan Agentlikka “Oltin Xumo” milliy kino mukofoti taqdimotini har yili an’anaviy ravishda o‘tkazib borish, “Ipak yo‘li durdonasi” Toshkent xalqaro kinofestivalini ta’sis etish va uni 2021-yildan boshlab muntazam o‘tkazib borish bo‘yicha tashabbus ko‘rsatish vazifasi yuklatilmoqda.
Kinematografiya agentligi oldiga xorijiy kinokompaniyalarni mamlakatga jalb qilish va hamkorlikda filmlar ishlab chiqarishni rivojlantirish vazifasi qo‘yilgan.
Milliy seriallar ishlab chiqarishni davlat tomonidan rag‘batlantirish, animatsion filmlar ishlab chiqarishga yosh multiplikator va animatorlarni keng jalb qilish uning asosiy ustuvor yo‘nalishlaridan biri bo‘ladi.
Shuningdek, agentlik zimmasiga sohada mualliflik huquqining kafolatli himoya qilinishini ta’minlash, kinoprokat tizimini rivojlantirish va milliy filmlarni jahon kino bozorlariga olib chiqish vazifasi yuklatilgan.