TOShKENT, 8 apr — Sputnik. O‘zbekiston va Qatar o‘rtasida to‘g‘ridan-to‘g‘ri aviaqatnov yo‘lga qo‘yilishi kutilmoqda. Bu haqda O‘zbekiston bosh vaziri o‘rinbosari, turizm va sport vaziri Aziz Abduhakimovning Qatar aviatsiya idoralari vakillari bilan uchrashuvida ma’lum qilindi.
Qatar delegatsiyasi respublikaga ikki mamlakat o‘rtasidagi havo qatnoviga doir Hukumatlararo bitim tuzish, shuningdek, to‘g‘ridan-to‘g‘ri yo‘lovchi aviaqatnovlarni yo‘lga qo‘yish masalalarini ko‘rib chiqish uchun kelgan.
Ta’kidlanishicha, havo qatnovi to‘g‘risida bitim imzolanishi O‘zbekiston va Qatar o‘rtasidagi hamkorlik aloqalarini yanada faollashtirish, sayyohlik va ishbilarmonlik almashinuvini jadallashtirilishiga xizmat qiladi.
“Qatar Airways” departamenti rahbari Salam al-Samarriy O‘zbekistonga parvozlarni amalga oshirish va respublika mintaqaviy aeroportlarida joriy qilingan "ochiq osmon" rejimidan foydalanishga qiziqish bildirgan.
Shuningdek, Fors ko‘rfazining boshqa mamlakatlaridan ham sayyohlarni jalb qilish mumkinligi ta’kidlandi.