TOShKENT, 29 mar — Sputnik. Navoiy viloyatida fuqaroga pichoqcha bilan jarohat yetkazgan aka-ukalar ustidan jinoiy ish ochildi. Bu haqda Tergov departamenti xabar qilmoqda.
Hodisa 25-mart kuni tungi soat 02:30larda Navoiy shahar I.Karimov ko‘chasida joylashgan “Amfiteatr” majmuasi qarshisida ro‘y bergan. 30 yoshli Jaloliddin N. va 27 yoshli Jamoliddin N. “Nexia-Ravon”da harakatlanib ketayotganlarida ular bilan yonma-yon harakatlanayotgan “Malibu” haydovchisi 28 yoshli Umid X.ga “nega o‘qrayib qaraysan” deb chekkaga to‘xtashgan.
Keyin hech bir sababsiz o‘zaro janjallashishgan. Natijada Umid X.ning o‘ng oyoq son sohasiga pichoqcha bilan bir necha marotaba urib jarohat yetkazganlar.
Aka-ukalarga nisbatan O‘zbekiston JKning 277-moddasi 2-qismi “a, b, v” bandi (Bezorilik, ya’ni bir guruh shaxslar tomonidan sovuq qurol bilan badanga o‘rtacha og‘ir shikast yetkazish) bilan jinoyat ishi qo‘zg‘atilgan.
Hozirda tergov harakatlari olib borilmoqda