TOShKENT, 26 mar — Sputnik. Toshkent shahar IIBB “Harakat xavfsizligi” oyligi doirasida poytaxt yo‘llarida tungi vaqtda o‘tkazilgan “TIG‘” profilaktik tadbirlari natijasi haqida bayonot berdi.
2021 yilning 22-mart kuniga o‘tar tunda YPX inspektorlari 138 ta transport vositalarining salon va yukxonalarini tekshirishgan. Yo‘l harakatining yetti nafar qatnashchilarida jami: 1 ta bita, 9 ta pichoq topilgan.
2021 yilning 23-mart kuniga o‘tar tunda 146 ta transport vositalarining salon va yukxonalari xolislar guvohligida ko‘zdan kechirilgan.
Natijada 12 nafar fuqaroda 10 ta pichoq va 1 ta beysbol bitasi topilgan.
Qayd etish joizki, tadbirlar davomida (2021 yil 13-martdan 23-martga qadar) poytaxt yo‘llarida 890 ta sovuq qurol topilgan.
Yo‘l harakati qatnashchilari bilan profilaktik suhbatlar o‘tkazilgan. Haydovchilarga turli misollar keltirilib, pichoq va boshqa xavfli buyumlarni olib yurmaslik tavsiya etilgan.
Mazkur yo‘nalishdagi ishlar davom etadi, deyiladi xabarda.