TOShKENT, 17 mar — Sputnik. Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Atabekov karantin choralari kuchaytiriladimi degan savolga javob berdi.
“Hammani bezovta qiladigan savol - karantin yana kuchaytiriladimi? Karantin yana keskinlashadimi, harakatlar chegaralanadimi, faoliyatlar to‘xtatiladimi - degan savollar qiziqtiradi.
Bizning javobimiz shu: qanaqa bo‘lishi va qanday tartibda bu cheklov tadbirlarini yoki karantin tadbirlarini tatbiq etilishiga biz o‘zimiz sababchimiz.
Agar biz hali bekor qilinmagan - doka niqobda bo‘lish, ijtimoiy masofani saqlash, antiseptik vositalardan foydalanish va aholi gavjum bo‘lgan joylarga borishdan o‘zimizni tiyish kabi jihatlarni yodimizdan chiqarmasdan, o‘sha kasallik manbaidan ikkinchi bir sog‘lom odamga yuqishiga yo‘q qo‘ymaydigan choralarni ko‘radigan bo‘lsak, demak vaziyatni bu darajada keskin, ya’ni cheklov va karantin tadbirlarni keskinlashiga hech qanday asos yo‘q.
Shu bilan birgalikda, biz haddan ortiq xotirjamlikka berilib kettikki, bu tabiiy kasallikni qayd etilishidagi statistik raqamlarni ortib borishida namoyon bo‘layapti”, - dedi SSV vakili.