O‘zbekiston sovg‘a qilgan 20 ta tez yordam mashinasi Qirg‘izistonga yetib bordi

TOShKENT, 14 mar — Sputnik. O‘zbekistondan Qirg‘izistonga 20 ta tez yordam mashinasi olib kelindi, deb xabar qilmoqda Sputnik Qirg‘iziston agentligi.

Eslatib o‘tamiz, 11-12 mart kunlari Qirg‘iziston prezidenti Sadir Japarov davlat tashrifi bilan O‘zbekistonda bo‘ldi. Tashrif doirasida O‘zbekiston prezidenti Shavkat Mirziyoyev va uning qirg‘izistonlik hamkasbi Toshkent shahridagi texnoparkka tashrif buyurdi. O‘zbekistonda ishlab chiqarilgan transport vositalarini ko‘zdan kechirish davomida Shavkat Mirziyoyev Qirg‘izistonga O‘zbekiston xalqi nomidan “Volkswagen Caddy” va “Isuzu D-Max” rusumli 20 ta tez yordam mashinalari sovg‘a qilinganligini ma’lum qildi.

13 mart kuni “Do‘stlik” nazorat o‘tkazish punkti orqali Qirg‘izistonga ushbu yordam mashinalari olib o‘tilgan. Avtomobillarni O‘sh hokimi Taalaybek Saribashov va boshqa mutasaddilar qarshi olgan.