TOShKENT, 11 mar — Sputnik. Ko‘ksaroy qarorgohida O‘zbekiston prezidenti Shavkat Mirziyoyev va Qirg‘iziston prezidenti Sadir Japarov ishtirokida oliy darajadagi O‘zbekiston-Qirg‘iziston sammitining asosiy tadbirlari boshlandi.
Davlat rahbari matbuot xizmati xabariga ko‘ra, avvaliga oliy martabali mehmonni rasmiy kutib olish marosimi bo‘lgan. Shavkat Mirziyoyev qirg‘izistonlik hamkasbi Sadir Japarovni samimiy qutlagan.
Ayni paytda davlat rahbarlarining tor doiradagi muzokaralari o‘tmoqda. Uchrashuv chog‘ida O‘zbekiston bilan Qirg‘iziston o‘rtasidagi strategik sheriklik munosabatlarini mustahkamlash, ko‘p qirrali hamkorlikni kengaytirish masalalari muhokama qilinadi.
Eslatib o‘tamiz, avvalroq Qirg‘iziston prezidenti Sadir Japarov davlat tashrifi bilan mamlakatga kelgani va Toshkentdagi Mustaqillik va ezgulik monumenti poyiga gul qo‘ygani xabar qilingan edi.