TOShKENT, 2 mar — Sputnik. “O‘zbekneftgaz” AJ boshqaruv raisi Mehriddin Abdullayev “Bunyodkor” futbol klubi prezidenti etib tayinlandi. Bu haqda klub matbuot xizmati xabar berdi.
1 mart kuni bo‘lib o‘tgan “Bunyodkor” futbol klubining Kuzatuv kengashi yig‘ilishida klub moddiy-texnik bazasini yanada mustahkamlash, musobaqalarda muvaffaqiyatli ishtirok etishini ta’minlash va boshqa bir qator tashkiliy masalalar muhokama qilingan. Bundan tashqari, klubga yangi prezident tayinlash masalasi ham ko‘rib chiqilgan.
“O‘zbekneftgaz” aksiyadorlik jamiyati boshqaruv raisi Mehriddin Razzoqovich Abdullayev rasman “Bunyodkor” futbol klubi prezidenti etib tayinlandi”, - deyilgan xabarda.
"O‘zbekneftgaz" endilikda jamoaning bosh homiysi bo‘ladi. Ilgari "O‘ztransgaz" bo‘lgan.
Mehriddin Abdullayev 1969-yil Buxoro viloyati Jondor tumanida tug‘ilgan. Mutaxassisligi – iqtisodchi, huquqshunos. U 2020-yil yanvaridan "O‘zbekneftgaz"ga rahbarlik qilib kelmoqda. Shuningdek, u O‘zbekiston Moliya vazirligi, Buxoro viloyati hokimligi, O‘zbekiston milliy banki va O‘zbekiston Hisob palatasida turli rahbarlik lavozimlarida faoliyat yuritgan.