TOShKENT, 28 fev — Sputnik. Samarqand viloyati IIB ijtimoiy tarmoqlarda tarqalgan hamshira ayolni urib sudrashgani aks etgan video yuzasidan rasmiy ma’lumot berdi.
Ma’lum qilinishicha, tasvirdagi holat 2021-yil 5-fevral kuni Pastdarg‘om tumanida sodir bo‘lgan.
Kelishmovchilik tumanning “Bog‘ishamol” mahallasida yashovchi, 1998-yilda tug‘ilgan fuqaro, X.D. hamda uning “A.Navoiy” MFYdagi uyida ijarada yashab kelayotgan, 1983-yilda tug‘ilgan, B.S.lar o‘rtasida sodir bo‘lgan.
Fuqaro X. ushbu uyni boshqa bir kishiga sotayotganligi sababli ijarachidan uyidan chiqishini so‘ragan. B. esa ushbu xonadonning ijara pulini mart oyiga qadar to‘lab qo‘yganligini, shu sababli uydan chiqmasligini aytgan.
Oqibatda janjal yuzaga kelgan. Natijada fuqaro B. tan jarohatlari bilan Pastdarg‘om tumani tibbiyot birlashmasiga yotqizilgan.
Holat yuzasidan barcha hujjatlar rasmiylashtirilgan va qonuniy qaror qabul qilish uchun Jinoyat ishlari bo‘yicha Pastdarg‘om tuman sudiga taqdim etilgan.