TOShKENT, 19 fev - Sputnik. Islom Karimov nomidagi Toshkent xalqaro aeroportida Rossiyaning "Aeroflot" yo‘lovchilari uchun qo‘shimcha qulaylik paydo bo‘ldi, deb xabar qilmoqda "Uzbekistan Airports" AJ.
Bugundan boshlab, U yerda o‘rnatilgan Self Check-In kioski xizmatidan, “Aeroflot” aviakompaniyasi yo‘lovchilari ham foydalanishi mumkin bo‘ldi. Self Check-In xizmati orqali yo‘lovchilar o‘zlarini o‘zlari ro‘yxatdan o‘tkazishi, samolyot ichida o‘rindiq tanlashi va joylashish haqidagi talonni ham olish mumkin.
Ma’lumot uchun, oldin ushbu xizmat faqat "Turkish Airlines" aviakompaniyasi yo‘lovchilari foydalanish imkoniga ega edilar.
Bugungi kunda "Uzbekistan Airports" AJga ushbu kioskalar xizmatlardan foydalanish borasida O‘zbekistonga parvozlarni amalga oshirayotgan barcha xorijiy aviakompaniyalar tomonidan qo‘llab-quvvatlanmoqda va ularning takliflari o‘rganilmoqda.
Keldajakda "Uzbekistan Airports" mustaqil ro‘yxatdan o‘tish tizimini yanada takomillashtirish va Self Check-In kiosklarini O‘zbekistondagi 11 ta xalqaro aeroportlarda bosqichma-bosqich o‘rnatishni rejalashtirgan.