TOShKENT, 9 fev - Sputnik. Qoraqalpog‘istonning Mo‘ynoq tumanida yangi "Sudochye-Akpetki” davlat buyurtma qo‘riqxonasi tashkil etildi, deb xabar qilmoqda Davlat ekologiya qo‘mitasi.
Ushbu qo‘riqxona Prezident qaroriga asosan tashkil qilingan bo‘lib, uning umumiy maydoni 280 507 gektarni tashkil qiladi.
Qo‘riqxonning asosiy maqsadi - qirg‘oq landshaftlari, kanallar, kollektorlar va ulardagi suv oqimi, suv atrofida yashovchi qushlar, noyob, yo‘q bo‘lib ketish xavfi ostida bo‘lgan baliqlar, yirtqich qushlar va sut emizuvchi hayvonlarni saqlab qolish hamda ularni qayta ko‘paytirishdir, - deyilgan xabarda.
Shuningdek, prezident qarorida Davlat ekologiya qo‘mitasiga 2021-yil yakuniga qadar Sudochye ko‘lini xalqaro ahamiyatga (Ramsar konvensiyasi) ega bo‘lgan suvli-botqoqli hududlar ro‘yxatiga kiritish bo‘yicha takliflar ishlab chiqish va Vazirlar Mahkamasiga kiritish vazifasi topshirildi.