TOShKENT, 7 fev — Sputnik. Islom taraqqiyot banki (ITB) guruhi boshqaruvchilari kengashi – Bank oliy boshqaruv organi raisi etib O‘zbekiston tomonidan boshqaruvchi, O‘zbekiston bosh vazirining o‘rinbosari, investitsiyalar va tashqi savdo vaziri Sardor Umurzakov saylandi.
Investitsiyalar va tashqi savdo vazirligi matbuot xizmati xabariga ko‘ra, bu O‘zbekiston tarixidagi birinchi holat.
O‘tgan yilning oktabr oyida Umurzakov Yevropa tiklanish va taraqqiyot banki (YeTTB) boshqaruvchilari kengashi raisining o‘rinbosari etib saylangan edi.
Islom taraqqiyot banki guruhi 1974-yilda Jidda (Saudiya Arabistoni) shahrida tashkil etilgan. ITB a’zolari tarkibiga 57 mamlakat kiradi. Bank faoliyatining asosiy yo‘nalishi iqtisodiyotning strategik tarmoqlarida yirik infratuzilmaviy va ijtimoiy ahamiyatga ega loyihalarni moliyalashtirishdir.