TOShKENT, 18 yanv — Sputnik. Oltiariq ko‘mir omboridagi 807,1 million so‘mlik talon-torojlik fosh etildi. Bu haqda Bosh prokuratura matbuot xizmati Sputnik nashriga ma’lum qildi.
Bosh prokuratura huzuridagi Departamentning Oltiariq tuman bo‘limi tergovga qadar tekshiruv o‘tkazilgan. Unda “Ko‘mir ta’minot” MChJga qarashli Oltiariq ko‘mir ombori sobiq mudiri M.M. umumiy qiymati 807,1 mln so‘m bo‘lgan 1 566 tonna ko‘mir mahsulotlarini sotib yuborib, talon-taroj qilganligi aniqlangan.
Mazkur holat yuzasidan M.M.ga nisbatan Jinoyat kodeksining 167-moddasi 3-qismi bilan (O‘zlashtirish yoki rastrata yo‘li bilan talon-toroj qilish) jinoyat ishi qo‘zg‘atilgan.
Hozirda tergov harakatlari o‘tkazilmoqda.