TOShKENT, 24 okt — Sputnik. Xalq ta’limi vaziri Sherzot Shermatovning ma’lum qilishicha, sinf rahbarligi uchun to‘lovlar 1,5 baravarga oshiriladi. Bu haqda vazir 24-oktabr kuni AOKAda o‘tkazilgan matbuot anjumanida ma’lum qildi.
Qayd etilishicha, yaqin kunlarda mamlakatdagi ta’lim-tarbiya tizimini yanada takomillashtirish, ilm-fan sohasini rivojlantirish masalasida O‘zbekiston prezidenti Farmoni loyihasi qabul qilinadi. Unga ko‘ra, metodistlarning ish haqi miqdori oliy toifali o‘qituvchining bazaviy ta’rif stavkasi miqdoriga tenglashtiriladi.
2024 yilga qadar esa yuqori natijalarga erishgan pedagoglar oylik maoshi mehnatga haq to‘lashning eng kam miqdori 15 baravarigacha bosqichma-bosqich oshirib boriladi.
Bundan tashqari bitiruvchilarning oliy ta’lim muassasalariga o‘qishga kirish ko‘rsatkichlari yuqori bo‘lgan umumta’lim muassasalarining rahbarlari rag‘batlantirilib, Xalqaro fan olimpiadalari g‘oliblarining o‘qituvchilariga to‘g‘ridan-to‘g‘ri oliy malaka toifasi beriladi.