TOShKENT, 13 avg - Sputnik. Rossiya va Tojikiston o‘rtasida avto-transport qatnovini tiklash muammosi juda dolzarb, dedi kecha o‘tkazilgan matbuot-anjumanida Rossiyaning Tojikistondagi elchixonasi konsullik bo‘limi boshlig‘i Valeriy Katunkin. Sputnik Tojikiston xabari asosida.
"Rossiya va Tojikiston o‘rtasida yagona quruqlik chegarasi yo‘q. Chegaralar ikki suveren davlat - O‘zbekiston va Qozog‘iston orqali o‘tadi. Va bu muammo (yer usti qatnovi - tahr.) haligacha hal qilinmadi", - dedi Katunkin.
Uning ta’kidlashicha, konsullik bo‘limi va elchixona avtokolonnalarni "yashil yo‘lak"dan O‘zbekiston va Qozog‘iston hududlari orqali o‘tishi uchun barcha imkoniyatlarni ishga solmoqda.
Shu bilan birga, Katunkin Qozog‘istonda karantin rejimi 16-avgustgacha amal qilayotganini eslatdi.
"Qozog‘istonlik hamkorlarning ma’lum qilishicha, ular ushbu kolonnani o‘tkazib yuborishga deyarli tayyor. Ammo tibbiy ko‘rsatkichlar nuqtayi nazaridan va jinoiy vaziyat bilan bog‘liq to‘g‘ridan-to‘g‘ri xavfsizlikni ta’minlay olmaydilar. Chunki (yo‘llar-tahr.) uzunligi 1700 kilometrni tashkil etadi va u aholi kam yashaydigan va cho‘l hududlari orqali o‘tadi", - dedi u.
Eslatib o‘tamiz, ijtimoiy tarmoqlarda Rossiya va Tojikiston o‘rtasidagi yer usti qatnovining tiklanishi haqidagi mish-mishlar tez-tez paydo bo‘lmoqda. Shu bilan birga, elchixona hozircha bunday harakatning iloji yo‘qligini ta’kidlamoqda.