TOShKENT, 9-iyul — Sputnik. “Qamchiq” dovonida yuk mashinasi jarlikka qulashi oqibatida ikki kishi qurbon bo‘ldi. Bu haqda IIV huzuridagi Tergov departamenti xabar qilmoqda.
Yo‘l-transport hodisasi 08-iyul kuni soat 07:30 da Pop tumani hududidan o‘tuvchi “Toshkent-Osh” avtomobil yo‘lning 223 kilometrida bo‘lgan. Sement yuklangan “Isuzu” mashinasi haydovchisi 28 yoshli J.J. “Toshkent” yo‘nalishi bo‘ylab harakatlanayotib boshqaruvni yo‘qotgan. So‘ngra yo‘lning qarama-qarshi tomoniga chiqib ketib, jarlikka ag‘darilib ketgan.
Oqibatda avtomashina haydovchisi J.J. va yo‘lovchisi 23 yoshli Sh.J.lar tan jarohatlari olib, hodisa joyida vafot etganlar.
Mazkur holat yuzasidan Jinoyat kodeksining 266-moddasi 3-qismi “a” bandi bilan jinoyat ishi qo‘zg‘atilgan.
Hozirda dastlabki tergov harakatlari olib borilmoqda.