TOShKENT, 9-iyul - Sputnik. Rossiya xalqaro havo qatnovini ikki bosqichda qayta tiklaydi. Bunday qaror mamlakatda koronavirus tarqalishiga qarshi kurash bo‘yicha tezkor shtab yig‘ilishidan keyin qabul qilindi.
Rospotrebnadzor tezkor shtab g‘oyasini qo‘llab-quvvatladi va 13 mamlakatga parvozlarni ochishni taklif qildi. Tegishli maktub Rosaviatsiya agentligi va transport vazirligiga jo‘natildi.
Hujjatda aytilishicha, epidemik vaziyat tahlil qilingandan keyin, Rospotrebnadzor parvozlarni qayta tiklash uchun birinchi bosqichda 13 davlatni nomzod sifatida ko‘rmoqda.
Gap Buyuk Britaniya, Vengriya, Germaniya, Daniya, Italiya, Niderlandi, Norvegiya, Polsha, Finlyandiya, Xitoy, Vyetnam, Mo‘g‘iliston va Shri-Lanka haqida ketmoqda.
Shu bilan birga, parvozlarni qayta tiklash muddatlari va Rossiya fuqarolarini parvozlarga qo‘yilishi haqida ma’lumot yo‘q.
Eslatib o‘tamiz, koronavirus pandemiyasi tufayli Rossiya 27-mart kuni xalqaro muntazam va charter reyslarini vaqtincha to‘xtatib qo‘ygan edi.