TOShKENT, 23-may - Sputnik. O‘zbekiston prezidenti Shavkat Mirziyoyev Karachi shahrida ro‘y bergan aviahalokat munosabati bilan Pokiston Islom Respublikasi prezidenti Orif Alvi va bosh vaziri Imron Xonga ta’ziya maktubini yo‘lladi.
Bu haqda prezident matbuot-xizmati xabar bermoqda
Mirziyoyev Pokiston xalqiga, marhumlarning oila a’zolari va yaqinlariga chuqur hamdardlik bildirgan.
Eslatib o‘tamiz, Pokistonda Karachi aeroporti yaqinida Airbus A-320 samolyotining qulashi oqibatida 90 dan ortiq odamlar qurbon bo‘ldi.
RIA Novosti axborot agentligining Pokiston Sog‘liqni saqlash vazirligiga tayanib bergan xabariga ko‘ra, bortda jami 99 kishi bo‘lgan. 91 nafar yo‘lovchi va sakkiz nafar ekipaj a’zolari. Shulardan 97 nafari halok bo‘lgan, ikki kishi omon qolgan. Ayni vaqtgacha 19 kishi jasadi identifikatsiya qilingan.
Samolyot uylarning ustiga qulagan, jabrlarganlar bor. Dastlabki ma’lumotlarga ko‘ra, 30 kishi kasalxonalarga olib borilgan.
Pokiston bosh vaziri Imron Xon samolyot qulashi bo‘yicha tergov ishlari boshlab yuborilganini ma’lum qilgan. Fuqarolik aviatsiyasi boshqarmasi ma’lumotlariga ko‘ra, bort o‘ziyozar asboblari topilgan, ular rasshifrovka uchun samolyot ishlab chiqaruvchilariga topshirilishi aytilgan.