TOShKENT, 28 apr — Sputnik. Bugun O‘zbekistonning Yevroosiyo Iqtisodiy Ittifoqi bilan hamkorligi yuzasidan Oliy Majlis Qonunchilik palatasining yakuniy qarori qabul qilindi. Bu haqda Oliy Majlis Qonunchilik palatasi deputati, “Yuksalish” umummilliy harakati raisi Akmal Burxanov telegram kanalida ma’lum qildi.
Qayd etilishicha, deputatlar O‘zbekistonning YeOIIga “kuzatuvchi davlat” maqomida ishtirok etishi maqsadga muvofiq deb topgan.
Ushbu qaror bo‘yicha yig‘ilishda ishtirok etgan jami 132 nafar deputatlardan 86 nafari tarafdor (yoqlab), 32 nafari qarshi, 14 nafari esa betaraf ovoz berishdi.
O‘zbekiston YeOIIga kuzatuvchi sifatida kiradi – Vazirlar mahkamasi taklifi
Eslatib o‘tamiz, avvalroq O‘zbekiston parlamenti ishchi guruhi YeOII bilan hamkorlik masalasini o‘rganishga kirishgani xabar qilingan edi. Shuningdek, Oliy Majlis Senatida mamlakatning ittifoq bilan hamkorlik istiqbollarini hamda ushbu xamkorlikning mamlakat milliy manfaatlariga ta’sirini chuqur va har tomonlama o‘rganish bo‘yicha maxsus ishchi guruhi tuzilgan.