TOShKENT, 9 apr - Sputnik. Harakatlanganda ruxsatnoma talab etilmaydigan avtotransport vositalari ro‘yxati va shaxsiy transportdan qanday hollarda ruxsatnoma-stiker talaba qilinmasligi ma’lum bo‘ldi.
Huquqiy axborot telegram kanalida e’lon qilingan ro‘yxatda quyidagi holatlarda ruxsatnoma talab qilinmasligi aytib o‘tilgan:
- Davlat va xususiy tibbiy sanitariya va epidemiologik xizmatlar ko‘rsatuvchi tashkilotlarning xizmat va xodimlarning shaxsiy avtomobillari;
- Homiladorlik, tug‘ruq, tan jarohati, OIV/OITS, onkologik yordam, nurlanish terapiyasi, gemodializ yordamini ko‘rsatish, jarrohlik amaliyoti zarur bo‘lganda, inson hayotiga xavf tug‘dirayotgan boshqa holatlar bilan bog‘liq hollarda tibbiyot muassasasiga borayotgan va undan qaytayotgan shaxsiy avtotransport vositalari;
- Litsenziyaga ega bo‘lgan taksi avtomobillari yetkazib berish xizmati ko‘rsatish va kechiktirib bo‘lmaydigan tibbiy muolaja kerak bo‘lgan bemorlarni olib borayotgan vaqtida;
- Kommunal xizmat ko‘rsatuvchi tashkilotlarning maxsus avtomobillari;
- DXX, IIV, Bosh prokuratura huzuridagi iqtisodiy kurash departamenti xodimlarining shaxsiy avtomobillari;
- Prezident administratsiyasi, Oliy majlis palatalari, Vazirldar Mahkamasi, Milliy gvardiya, Davlat Bojxona qo‘mitasi, Mudofaa vazirligi, FVV, Sud va prokuratura organlarining xizmat avtomobillari;
- “O‘zbekiston temir yo‘llari” AJ, Uzbekistan Airways, Uzbekistan Airports va Uzaeronavigatsiya agentligining xizmat avtomobillari;
- Hisob palatasi, biznes-ombudsmen, Ombudsmen, Inson huquqlari milliy markazi, Savdo-sanoat palatasi rahbarlari va ularning o‘rinbosarlari xizmat avtomobillari;
- Vazirliklar, davlat qo‘mitalari, agentliklar va boshqa davlat xo‘jalik boshqaruv organlarining birinchi rahbarlari;
- O‘zbekiston teleradiokompaniyasi va Milliy axborot agentligining xizmat avtomobillari;
- “Respublika inkassatsiya xizmati” DUK avtomobillari;
- Xorijiy davlat vakolatxonalarining CMD, D, UN, M, X davlat belgili avtomobillari;
- Aloqa xizmati ko‘rsatuvchi tashkilotlar, O‘zbekiston pochtasi, O‘zbektelekom, O‘zinfokomga tegishli xizmat avtotransport vositalari;
- N1, N2, N3 toifaga kiruvchi avtotransport va qishloq xo‘jalik texnikalari;
- “Toshshahartransxizmat” avtobus saroyining M2 va M3 toifadagi transport vositalari;
- Dafn marosimida xizmat ko‘rsatuvchi maxsus avtomobillar;
Shuningdek, mavsumiy qishloq xo‘jalik mahsulotlarini yetkazib beruvchi M1 toifadagi shaxsiy transport vositalari ham 1 nafar yo‘lovchi bilan harakatlanishiga ruxsat berilgan.