TOShKENT, 31 mar — Sputnik. Latviya va Erondan Namanganga keltirib, karantin kuzatuviga olingan fuqarolar o‘z uylariga qaytishdi. Bu haqda Namangan viloyati hokimligi matbuot xizmati Sputnik muxbiriga ma’lum qildi.
Erondan olib kelingan 37 nafar va Latviya davlatidan qaytgan 175 nafar mamlakat fuqarolari To‘raqo‘rg‘on tumanidagi yuqumli kasalliklar shifoxonasi hamda “Kosonsoy” sihatgohida karantin kuzatuviga olingan edilar. Ular karantin muddatini tamomladilar va o‘z yashash viloyatlariga mamnuniyat bilan jo‘nab ketishdi.
Shu davr mobaynida sihatgoh va shifoxonada mehmonlarga barcha sharoitlar yaratib berildi. Salomatliklari esa shifokorlarning qat’iy nazoratida bo‘ldi.
Shuningdek, Janubiy Koreya davlatidan O‘zbekistonga olib kelinganlar xuddi shu tartibda Toshkent viloyati Bo‘stonliq tumanidagi “Chotqol” sihatgohida karantinda bo‘lishdi. Ular orasida 29 nafar Namangan viloyati vakillari ham bor edi. Bugun ular ham Namanganga qaytib kelishdi.