TOShKENT, 11 fev - Sputnik, Dilshoda Rahmatova. O‘zbekistonda umra safariga shu kechayu-kunduzda 200 mingdan ziyod talab bor. 22-iyunga qadar yuz mingdan ortiq fuqarolar Umra ziyoratiga olib boriladi, dedi jurnalistlarga seshanba kuni bo‘lib o‘tgan brifingda din ishlari bo‘yicha qo‘mita raisining birinchi o‘rinbosari Muzaffar Komilov.
Komilov umra masalalari ilgarilari muayan cheklovlarga ega bo‘lgani, 2017-yilga qadar yiliga 6 ming atrofida fuqarolar umra ziyoratiga borganliklari, 2017 yildan ushbu ko‘rsatkich 10 mingtaga chiqarilganini va so‘ngra O‘zbekiston prezidentining tashabbuslari bilan umra ziyorati bo‘yicha kvotalar olib tashlanganini eslatib o‘tdi.
"2020 yilning 10-martidan boshlab fuqarolarimizning umra safariga borish istaklarini to‘laqonli bajarish uchun qo‘shimcha 3-reys ham amalga oshiriladi. Birinchi fevraldan kunlik reyslarning bittasi Madina shahriga, yana bittasi Jidda shahriga amalga oshirilmoqda. Uchinchi reys ham xalqimiz istagi asosida Madina shahridagi xalqaro aeroportga qo‘ndiriladi", - deb aniqlik kiritdi Komilov.
Ta’kidlanishicha, din ishlari bo‘yicha qo‘mita va O‘zbekiston musulmonlari idorasi tomonidan amalga oshirilgan chora-tadbirlar natijasida respublika hududlarida umra navbatlarining sezilarli darajada kamayishiga erishilgan. Hozirgi kunda aksariyat viloyatlarda, jumladan, Buxoro, Samarqand, Qashqadaryo, Sirdaryo, Xorazm, Jizzax, Navoiy va Qoraqalpog‘iston Respublikasida joriy navbatlar tugatilgan.